Սնուցումը գերճնշման ժամանակ. ինչ է կարելի և ինչ չի կարելի ուտել. izmirlianmedicalcenter.com

Ավստրալացի փորձագետներն անվանել են այն մթերքները, որոնք կարող են նվազեցնել զարկերակային ճնշման բարձրացումը գերճնշման ժամանակ: Գերճնշումը թույլ արտահայտված ախտանիշների պատճառով համարվում է համր մարդասպան: Բարձր զարկերակային ճնշումը մեծացնում է սիրտ-անոթային հիվանդությունների, կաթվածի, սրտային անբավարարության և երիկամային հիվանդությունների ռիսկը: Սակայն, ըստ փորձագետների, այս վտանգավոր վիճակը կարելի է կանխել սննդակարգի պարզ փոփոխությունների օգնությամբ:

Ավստրալիայի Նյուքասլ համալսարանի երեք սննդաբաններ խոսեցին այն մթերքների մասին, որոնք պետք է գերճնշման ժամանակ ներառել ճաշացանկի մեջ, ինչպես նաև այն մթերքների մասին, որոնցից պետք է խուսափել կամ դրանց կիրառումը հասցնել նվազագույնի:
 
Ի՞նչն է օգտակար

Վարսակի  փաթիլներ

Գիտնականները վերլուծել են 400 առողջ մարդու մոտ իրականացված հինգ հետազոտական փորձարկումների տվյալները, որոնցով ստուգվել է վարսակի ազդեցությունը զարկերակային սիստոլիկ (ճնշում, որի ժամանակ սիրտն արյուն է մղում) և դիաստոլիկ (երբ սիրտը թուլանում է) ճնշման վրա:

Հետազոտողները հայտնաբերել են, որ օրական 60 գ հերկուլեսի կամ 25 գ վարսակի թեփի կիրառումը սիստոլիկ զարկերակային ճնշումը նվազեցնում է 2,7 մմ.սնդ. սյունով, իսկ դիաստոլիկը՝ 1,5 մմ.ս.ս.-ով:

Վարսակի կամ վարսակի թեփի այդպիսի քանակությունը պարունակում է մոտավորապես 4 գ որոշակի տեսակի թելիկներ, որոնք կոչվում են բետա-գլյուկան: Դրանց յուրաքանչյուր գրամը կարող է նվազեցնել դիաստոլիկ ճնշումը 0.11 մմ.ս.ս-ով: Փորձագետները  խորհուրդ են տալիս ամեն օր սննդում ներառել վարսակ. տղամարդկանց` 30 գ, կանանց՝ 25 գ:

Ճակնդեղ

Ճակնդեղը շատ հարուստ է անօրգանական նիտրատներով, որոնք մարսողության ժամանակ վերածվում են ազոտի օքսիդի, որը նպաստում է զարկերակների լայնացմանը, ինչի հաշվին ճնշումն իջնում է: Ճակնդեղի հյութ խմող 16 առողջ երիտասարդ տղամարդկանց վրա նախկինում իրականացված հետազոտությունների տվյալներն ապացուցում են, որ նրանց մոտ այդ դեպքում սիստոլիկ զարկերակային ճնշումը նվազել է միջինում 4,4 մմ.ս.ս.-ով, սակայն դիաստոլիկ զարկերակային ճնշման փոփոխություն չի դիտվել:

Ճնշման հետ խնդիր ունեցող 68 հասուն մասնակիցների վրա վերջերս իրականացված փորձարկումները ցույց տվեցին, որ սիստոլիկ և դիաստոլիկ զարկերակային ճնշումը նվազել է համապատասխանաբար 7,7 մմ.ս.ս.-ով և 5.2 մմ.ս.ս.-ով:

Վիտամին С

Թարմ մրգերի և բանջարեղենի միջին չափաբաժինը պարունակում է 10-40 մգ վիտամին С (ասկորբինաթթու):

Վիտամին С-ի ազդեցության ուսումնասիրման նպատակով իրականացվել է 29 հետազոտություն, որի ժամանակ ութ շաբաթվա ընթացքում փորձարկվողները օրական ստացել են 500 մգ վիտամին С :

Բոլոր մասնակիցների մոտ նկատվել է սիստոլիկ զարկերակային ճնշման իջեցում միջինը 3.84 մմ.ս.ս.-ով և դիաստոլիկ զարկերակային ճնշման իջեցում ՝1.48 մմ.ս.ս.-ով: Սակայն երիկամային քարերի առաջացման բարձր ռիսկով մարդկանց փորձագետները խորհուրդ են տալիս զգուշությամբ ընդունել վիտամին  С:

Ո՞ր մթերքները պետք է բացառել սննդակարգից

Կերակրի աղ

Աղը կամ նատրիումի քլորիդն արդեն մի քանի հարյուր տարի  կիրառվում է սննդամթերքի պահպանման և համի ուժեղացման նպատակով:  Սակայն աղի չափից ավելի կիրառումը նպաստում է զարկերակային ճնշման բարձրացմանը:

Հետազոտության ընթացքում պարզվել է, որ ամենօրյա սննդակարգում աղի նվազումը 4,4 գրամով կարող է բերել սիստոլիկ ճնշման նվազեցման 4.2 մմ.ս.ս.-ով, իսկ դիաստոլիկը՝ 2.1 մմ.ս.ս.-ով: Հիպերտոնիկ հիվանդների մոտ այս ցուցանիշներն ավելի բարձր են՝ 5.4 մմ.ս.ս. (սիստոլիկ) և 2,8 մմ.ս.ս. (դիաստոլիկ):

Ալկոհոլ

Ալկոհոլային խմիչքները սկզբում նվազեցնում են ճնշումը, ապա ավելի են բարձրացնում: Շատ հաճախ դա տեղի է ունենում գիշերային քնի ժամանակ` երեկույթից հետո կամ արթնանալուց անմիջապես հետո: Հետազոտողները եկան այն եզրակացության, որ տղամարդկանց մոտ ալկոհոլի օգտագործումից հետո ճնշման բարձրացման ռիսկն ավելի բարձր է, քան կանանց մոտ:

Կոֆեին

Կոֆեին պարունակում է ո՛չ միայն սուրճը, այլ նաև թեյը, կոլան և էներգետիկ ըմպելիքները: Հաճախ ճնշման բարձրացում դիտվում է սուրճ խմելուց հետո:  Օրինակ, հինգ փորձարկումների ժամանակ մասնակիցները խմել են 1-2 բաժակ թունդ սուրճ: Այդ ըմպելիքի խմելուց հետո երեք ժամվա ընթացքում սիստոլիկ զարկերակային ճնշման բարձրացումը կազմել է 8,1 մմ.ս.ս., իսկ դիաստոլիկը՝ 5,7 մմ.ս.ս.:

Հարցեր, պատասխաններ, մեկնաբանություններ